నిజామాబాద్ A9 న్యూస్:
*డిసెంబర్ 16న ఎల్లన్న స్మారక సభను జయప్రదం చేయండి…!
సిపిఐఎంఎల్ న్యూ డెమోక్రసీ నాయకులు పిట్ల ఎల్లన్న 32వ స్మారక సభ సందర్భంగా ఎల్లన్న స్థూపానికి కార్మికులు కలర్స్ వేయడం జరిగింది. 16 డిసెంబర్ 2023న పోరాట యోధుడు అమరవీరుడు ఎల్లన్న స్థూపం వద్ద నూతన డివిజన్ కమిటీ ఆధ్వర్యంలో నివాళి అర్పించి అనంతరం నందిగల్లీలోని శివ గార్డెన్లో సభ ఏర్పాటు చేస్తున్నట్లు న్యూడెమోక్రసీ ఆర్మూర్ డివిజన్ కార్యదర్శి దాసు తెలిపారు. గురువారం భీంగల్ పట్టణంలో పాత్రికేయుల సమావేశాన్ని నిర్వహించారు. దాసు మాట్లాడుతూ భూమి కోసం, భుక్తి కోసం, ఈ దేశ విముక్తి కోసం ఎల్లన్న తన ప్రాణాలను తృణప్రాయంగా అర్పించినారని ఆయన తెలిపారు. స్వాతంత్ర్య భారతంలో పేదరికం, నిరుద్యోగం, ఆర్థిక అసమానతలు హద్దు మీరుతున్నాయని ఆయన అన్నారు. మోడీ ఫాసిస్టు విధానాలతో భారత ప్రజానీకం అవస్థలు పడుతున్నారని ఆయన అన్నారు. కార్మిక, రైతు, ప్రజా వ్యతిరేక విధానాలు మోడీ అమిత్షాలు అవలంబించి ఆదాని, అంబానీ లకు ఊడిగం చేస్తున్నారని ఆయన తెలిపారు.
ఈ పాత్రికేయుల సమావేశంలో సిపిఐఎంఎల్ న్యూడెమోక్రసీ నాయకులు ఎండి కాజా మోహీనోద్దీన్, వి.బాలయ్య, ధర్మపురి, లింబాద్రి, సాయన్న, రాజు, చారి తదితరులు పాల్గొన్నారు.
