A9 న్యూస్ ప్రతినిధి జక్రన్ పల్లి:
నిజామాబాద్ జిల్లా జక్రాన్పల్లి మండలం ప్రాంతంలో వైద్య సేవల నాణ్యతను మెరుగుపరచడం కోసం ఆరోగ్య విభాగం అధికారులు అప్రమత్తమవుతున్నారు. ఈ క్రమంలో డి.పి.టి. విభాగం అధికారులు, జిల్లా మెడికల్ అండ్ హెల్త్ ఆఫీసర్ (డిఎంహెచ్వో) రమేష్, మెడికల్ ఆఫీసర్ రవీందర్ కలిసి శనివారం జక్రాన్పల్లి అంబులెన్స్పై ఆకస్మిక తనిఖీలు నిర్వహించారు.
ఈ సందర్భంగా వారు అంబులెన్స్లో అందుబాటులో ఉన్న అత్యవసర వైద్య పరికరాలు, ఔషధాల సరఫరా, ఆక్సిజన్ సిలిండర్లు, ఫస్ట్ఎయిడ్ కిట్లు, సిబ్బంది విధి నిర్వహణ తీరును సమగ్రంగా పరిశీలించారు. అంబులెన్స్ ఎప్పటికప్పుడు గ్రామ ప్రజలకు, ముఖ్యంగా గర్భిణీ స్త్రీలు, ప్రమాద బాధితులు, అత్యవసర పరిస్థితుల్లో తక్షణ సేవలు అందించేందుకు సిద్ధంగా ఉండాలని ఆదేశాలు జారీ చేశారు.
డిఎంహెచ్వో రమేష్ మాట్లాడుతూ ప్రతి అంబులెన్స్ గ్రామీణ ప్రాంతాల్లో ప్రజలకు ప్రాణాధారంగా నిలుస్తుంది. చిన్న చిన్న నిర్లక్ష్యం కూడా ప్రజల ప్రాణాలకు ప్రమాదకరం కావచ్చు. అందుకే ప్రతి సిబ్బంది తన బాధ్యతను నిబద్ధతతో నిర్వర్తించాలి అని తెలిపారు. మెడికల్ ఆఫీసర్ రవీందర్ కూడా సిబ్బందికి క్రమం తప్పకుండా అంబులెన్స్ పరికరాలను తనిఖీ చేసి, ఎప్పటికప్పుడు వినియోగానికి సిద్ధంగా ఉంచాలని సూచించారు.
