వర్షాకాల ఇబ్బందులకు శాశ్వత పరిష్కారం దిశగా అడుగు – గ్రామస్థుల్లో హర్షం…
ఆలూరు మండలం, దేగాం గ్రామం :
దేగాం గ్రామ బస్టాండ్ కూడలి వద్ద కల్వర్ట్ లేకపోవడంతో ప్రతి వర్షాకాలంలో వర్షపు నీరు రోడ్డుపై చెరువులా నిలిచి సమీపంలోని ఇళ్లు, రైస్ మిల్లులోకి ప్రవహిస్తూ ప్రజలు తీవ్ర ఇబ్బందులు ఎదుర్కొంటున్నారు. ఎన్నో ఏళ్లుగా గ్రామస్థులు ఎదురుచూస్తున్న ఈ సమస్యకు ఎట్టకేలకు పరిష్కార మార్గం ఏర్పడింది.
గ్రామ పంచాయతీ తీర్మానం చేసి, ఎంపీడీఓ ద్వారా ఆర్ అండ్ బీ (R&B) అధికారులకు ప్రతిపాదనలు పంపగా, మహేష్ కుమార్ గౌడ్ మరియు వినయ్ కుమార్ రెడ్డి సహకారంతో కల్వర్ట్ నిర్మాణానికి రూ.12 లక్షల నిధులు మంజూరయ్యాయి.
ఈ కల్వర్ట్ నిర్మాణం పూర్తయితే వర్షపు నీరు సక్రమంగా వెళ్లిపోవడంతో రహదారిపై నీరు నిలిచిపోవడం, ఇళ్లలోకి, రైస్ మిల్లులోకి నీరు చేరడం వంటి సమస్యలకు శాశ్వత పరిష్కారం లభిస్తుందని గ్రామస్థులు ఆనందం వ్యక్తం చేస్తున్నారు. దీంతో రాకపోకలు కూడా మరింత సులభతరం కానున్నాయి.
ఈ సందర్భంగా కల్వర్ట్ నిర్మాణానికి నిధులు మంజూరు అయ్యేలా కృషి చేసిన మహేష్ కుమార్ గౌడ్, వినయ్ కుమార్ రెడ్డిలకు దేగాం గ్రామ ప్రజలు హృదయపూర్వక కృతజ్ఞతలు తెలిపారు. అలాగే పనులు త్వరితగతిన ప్రారంభించి నాణ్యతతో పూర్తి చేయాలని సంబంధిత అధికారులను కోరారు.
