ఆర్మూర్:
నాలుగు దశాబ్దాలకు పైగా ఉపాధ్యాయ వృత్తిని సేవాయజ్ఞంగా భావించి, అంకితభావం, క్రమశిక్షణ, ఉన్నత విలువలతో విద్యాసేవలు అందించిన సీనియర్ సోషల్ టీచర్ గోలి లింగయ్య పదవీ విరమణ సందర్భంగా ఘన సన్మాన మహోత్సవం నిర్వహించారు.
41 సంవత్సరాల పాటు వేలాది మంది విద్యార్థులకు విద్యాబోధన చేయడమే కాకుండా, నైతిక విలువలు, సామాజిక బాధ్యత, క్రమశిక్షణ, దేశభక్తి వంటి ఉన్నత ఆదర్శాలను అలవర్చడంలో గోలి లింగయ్య విశిష్ట పాత్ర పోషించారని సభలో పలువురు కొనియాడారు. ఆయన వద్ద విద్యనభ్యసించిన అనేక మంది నేడు వివిధ రంగాల్లో ఉన్నత స్థానాల్లో కొనసాగుతూ తమ గురువును జీవితాంతం ఆదర్శంగా భావిస్తున్నారని పేర్కొన్నారు.
ఉపాధ్యాయ సంఘాల బలోపేతం, ఉపాధ్యాయుల హక్కుల పరిరక్షణ, విద్యా వ్యవస్థ అభివృద్ధి కోసం ఆయన చేసిన సేవలు చిరస్మరణీయమని సహచర ఉపాధ్యాయులు తెలిపారు. నిరాడంబర వ్యక్తిత్వం, నిజాయితీ, సేవాభావంతో అందరి అభిమానాన్ని, గౌరవాన్ని సంపాదించుకున్నారని అన్నారు.
ఈ సందర్భంగా సహచర ఉపాధ్యాయులు, పూర్వ విద్యార్థులు, ప్రజాప్రతినిధులు, విద్యావేత్తలు, కుటుంబ సభ్యులు కలిసి గోలి లింగయ్యను శాలువాతో ఘనంగా సన్మానించి, జ్ఞాపికను అందజేసి ఆయన సేవలను కొనియాడారు.
“పదవీ విరమణ ఉద్యోగానికే… గురువు సేవలకు కాదు. శిష్యుల హృదయాల్లో గురువు చిరస్థాయిగా నిలిచిపోతారు” అంటూ పలువురు భావోద్వేగంగా నివాళులర్పించారు. అనంతరం గోలి లింగయ్యకు పదవీ విరమణ శుభాకాంక్షలు తెలియజేస్తూ ఆయురారోగ్యాలు, ఆనందం, సుఖశాంతులతో కూడిన జీవితం కలగాలని ఆకాంక్షించారు.
